Tidarfelagi.com

ታሪክን ወደ ፊት

ከምናምን አመታት በፊት በቀዳማዊ ሀይለሥላሴ እና በጎጃሙ ገዥ ራስ ሃይሉ መሀል ሃይለኛ የስልጣን ትግል ይካሄድ ነበር ፤ ራስ ሃይሉ ከብዝበዛና ከውርስ የተገኘ መአት ብር ነበረው ፤ ተፈሪ ከጎጄው ጋር ሲወዳደር እልም ያለ ችስታ ነበር ማለት ይቻላል ፤ በዚያ ላይ ተፌ መላውን ጦቢያ በስሩ መጠቅለል ይፈልጋል፤ እና መፋጠጥ መመላለስ ጀመሩ ፤ የተመላለሱበትን ዶሴ አግኝቸ እስካካፍል በዚህ ግምት አዝግሙ።

ተፌ :- ስማ! ቀዳማዊ ሀይለ ሥላሴ በሚል ስም ነግሻለሁ ፤ በአራቱ መአዘን ያለው ሁሉ ፀጥ ለጥ ብሎ በመገዛት ላይ ይገኛል: በል አንተም የእውቅና ሰርተፍኬቱን ላክልኝ “
ሃይሉ ;- “ ሰውየ! ከመደብ ተነስተህ አልጋ ወራሽ ነኝ ስትል ዝም ብልህ ጭራሽ የገዛ ስሜን ሰርቀህ በላዩ ላይ “ሥላሴ “ ጨምረህ ልትነግስ አማረህ”

ብቻ የሆነ ጊዜ ላይ ተፈሪ ራስ ሀይሉን ሰበብ ፈልጎ ሸብ አደረገው፤ የተፈሪ ዳኞች በተከሳሹ ላይ ሞት ፈረዱበት ፤ ተፈሪ ግን “ ሞቱን ምረነዋል፤ ታስሮ ይቀመጥ “ ብሎ ተጎዘጎዘ ፤ በጊዜው እስር ቤት እንደስሙ ፍርደኛ የሚታሰርበት ቤት ነበር ፤ ግድንግድ የብረት ካቴና ፤ ገንባሌ ማሰርያህ ላይ ይገጠምልሀል ፤ብዙ ከቆየህ የታሰርክበት የእግር ብረት እግርህን ይገዘግዝውና ጋንግሪን ይቆርጥልሀል ፤

ብዙም ሳይቆይ ሀይልሻ ምህረት ሳይሆን ምሬት እንደተቀበለ ገባው ፤ ብቻ ራርተው ከእስርቤት ይለቁኛል ወይም የሆኑ ሰዎች በኮማንዶ ነፃ ይወጡኛል 🙂 ብሎ ቢጠብቅም ኮሽ እሚል የለም፤ እና ራስ ሀይሌ (ሩት) ከእስር ስላልተለቀቀ ፤ የሚከተለውን ነጠላ ዜማ ለቀቀ ፤
“ሰው በድየ ነበር እኔም እንደዋዛ
ቁናው ቁናየ ነው ትንሽ ዙሩ በዛ “
ቁምነገሩ ያለው እዚህ ላይ ነው፤

We learn from history that we do not learn from history.” አለ ሄግል !
አንዳንዴ ሳስበው፤ “ያበራሽን ጠባሳ ያየ በእሳት አይጫወትም “ ያሚለውን ተረት የፈጠረው ሰውየ የሰውን ባህርይ የተረዳ አይመስለኝም! ሰው እንኳን ከሌላው ከራሱ መከራ አይማርም ፤ አበራሽ ራሷ እድሉን ብታገኝ ባዲስ መልክ በሳት መጫወቷ አይቀርም፤

Bewketu Seyoum (Ge’ez: በዕውቀቱ ስዩም) is an Ethiopian writer and poet from Mankusa, northwest of Addis Ababa.

2 Comments

  • yihenewmeng200@gmail.com'
    Yihenew commented on April 21, 2021 Reply

    በጣም አሪፍ አሪፍ ነገሮች እየቅርቡ ነው

  • biniesh87@gmail.com'
    biniesh87@gmail.com commented on April 24, 2021 Reply

    nice to see a blog like this, temechtofnal be app melku mehonu. update daily

አስተያየትዎን እዚህ ይስጡ

የኢሜል አድራሻዎ አይወጣም

Loading...